கடவுள் வீட்டு வாசலுக்கு வந்தார்
பாத்திரத்துடன் வந்த எனக்கு ஒரு கிலோவுக்கு
நாற்பத்தைந்து பூச்சிகளை நூற்றைம்பதுக்கு
விற்று விட்டு
சொம்பு தண்ணீரைக் குடித்து விட்டுச் சென்றார்
பூச்சிகளின் மீசையுடன் தோலையும் தலையையும்
பிய்த்துக் கொண்டேயிருக்கிறேன்
மனம் பாட்டியை மொய்த்துக் கொண்டிருக்கிறது
இவர்களைக் கடவுளென அறிமுகப்படுத்தியவர்
அசைவ உணவைத் தவிர்த்த பாட்டிதான்
கடலைப் பற்றிய பாட்டியின் புரிதல்கள் விசித்திரமானதாகப் படும்
கடலம்மாவிடமிருந்து கடல் குட்டிகளை
கடத்திக் கொல்பவர்களையும்
விற்பவர்களையும் கடவுள் என்பார்
கடலுணவுக்கு மட்டும் நாள் கிழமை எதுவும் பார்க்க மாட்டார்
கடலுணவுகளை வாசனை பிடித்தே உப்பு
புளி கூட்டி வைக்கும் சமையலின் சுவை கனகச்சிதமாகயிருக்கும்
மீன் முள்களைக் கொண்டு கைவேலை செய்வார்
கடலில் கலக்கும் நதிகளிடம் தான் சொல்ல
வேண்டிய இரகசியமொன்று இருக்கிறதென்பார்
கடல் குறித்த கதைகளின் முடிவு சுபமே ஆனாலும் கண் கலங்குவார்
பாட்டியின் வைராக்கியத்தில் வெல்லாத ஒன்றென தாத்தா சுட்டிக்காட்டுவது
கடலுணவு சத்துகளைப் பற்றிய புரிதல்களைத்தான்
ஒரே தோல்வியோடு தாத்தாவும்
ஒரே புதிரோடு பாட்டியும் சென்றே விட்டார்கள்
பதினாறாம் தேதி காரியத்தில் பாட்டியின் ஊரிலிருந்து
வந்தவர் புதிரை உடைத்தார்
மருதென்பவருக்கும் பாட்டிக்குமான காதலை
கடலம்மா புயலொன்றில் பறித்திருக்கிறார்
சமயத்தில் பைத்தியக்காரத்தன வைராக்கியங்களுக்குப் பின்
ஆகச் சிறந்த அன்பு இருக்கவே செய்கிறது...

- சீதா, சென்னை