காலணிகளை கழற்றிவைத்துவிட்டு
கோவிலுக்குள் தெய்வமானவன்
திரும்பி வந்து அணிந்ததும்
மனிதனாகிப் போனான்!
------------------------------
கட்டை விரல் பகுதியில்
தேய்ந்தும்,
மற்ற விரல்கள் பகுதியில்
அச்சு பதிந்தும்,
உழைத்து நிறம் மங்கிய
அப்பாவின் காதி செருப்பால்
பக்கத்தில் பளபளக்கிறது
மகனின் ரீபோக்.
-------------------------------
ஒன்றில் சற்றே
வார் அறுந்த வுட்லாண்ட்ஸ்.
இன்னொரு காலில்
தையல்கள் சந்தித்த
ரப்பர் செருப்பு என
வறுமையிலும் சமத்துவத்தை
பறைசாற்றி அலைகிறான்
பேப்பர் பொறுக்கும் சிறுவன்.
------------------------------
இருச்சக்கர விபத்து,
கடற்கரை களிப்பு,
கலவர துப்பாக்கிச்சூடு,
ஜோடி மாறிடும்
திருமண வீடு,
தேய்ந்துவிட்ட அலட்சியம்...
என நிகழ்ந்த சம்பவத்தின்
மௌன சாட்சியாய் இருக்கிறது
ஒவ்வொரு ஒற்றை செருப்பும் !
---------------------------------
விசேஷ வீட்டின்
வரவேற்பறையில்...
நிறத்தில்,
தரத்தில்,
அளவில்,
சிதறிக் கிடந்த
காலணிகளுக்கு நடுவில்
அழகாய் சிரித்தது
மிக்கி மௌஸ்
படம் போட்ட
குழந்தையின் செருப்பு.
- சஜயன்